Num 18 | NdeIBE | STEP | UJehova wathi ku-Aroni, “Wena, lamadodana akho labemuli kayihlo lizakuba lomlandu wokukhangela ukwephulwa kwemithetho yendawo yokukhonzela, njalo wena kanye lamadodana akho yini lodwa elizakuba lomlandu walabo abonela abaphristi.

Numbers 18

Imisebenzi yabaPhristi leyabaLevi

1 UJehova wathi ku-Aroni, “Wena, lamadodana akho labemuli kayihlo lizakuba lomlandu wokukhangela ukwephulwa kwemithetho yendawo yokukhonzela, njalo wena kanye lamadodana akho yini lodwa elizakuba lomlandu walabo abonela abaphristi.

2 Letha abaLevi bakini bevela ezizwaneni zabokhokho benu bazohlanganyela kunye lani bakuphathise wena lamadodana akho lapho lisenza inkonzo phambi kweThente lobuFakazi.

3 Bazakuba ngaphansi kwakho njalo benze yonke imisebenzi yaseThenteni, kodwa akumelanga basondele phansi kwezimpahla zendlu engcwele kumbe e-alithareni, funa lonke, wena kanye labo life. 4 Kumele bahlanganele lawe babe lomlandu wokunakekela iThente lokuHlanganela – wonke umsebenzi weThenteni – njalo akungabikho loyedwa ozasondela lapho wena okhona.

5 “Wena uzakuba lomlandu wokugcina indlu engcwele le-alithare, ukuze abako-Israyeli bangehlelwa lulaka njalo. 6 Mina ngokwami ngibakhethile abafowenu abaLevi phakathi kwabako-Israyeli ukuba babe yisipho kuwe, behlukanisele uJehova ukuba benze umsebenzi eThenteni lokuHlanganela.

7 Kodwa wena kanye lamadodana akho yini lodwa elivunyelwayo ukwenza umsebenzi wobuphristi kukho konke okuse-alithareni langaphakathi kwekhetheni. Ngikunika umsebenzi wobuphristi kukho konke okusealithareni langaphakathi kwekhetheni. Ngikunika umsebenzi wobuphristi njengesipho. Loba ngubani omunye ozasondela endaweni engcwele kumele abulawe.”

Ukunikelela abaphristi labaLevi

8 UJehova wasesithi ku-Aroni, “Mina ngokwami yimi engikunike umlandu wokukhangela iminikelo eyethulelwa mina, yonke iminikelo engcwele engiyiphiwa ngabako-Israyeli ngiyinika wena lamadodana akho kube yingxenye yesabelo sakho esimi njalo. 9 Kumele uzuze leyo ngxenye yomnikelo ongcwelengcwele ongatshiswanga. Kuzo zonke izipho abaziletha kimi zingumnikelo ongcwelengcwele, loba ngowamabele loba ngowesono kumbe owecala, leyongxenye yomnikelo ngeyakho lamadodana akho. 10 Idle njengento engcwelengcwele; wonke owesilisa kumele ayidle. Kumele akuphathe njengento engcwele.

11 “Lokhu lakho ngokwakho: konke okubekwa eceleni kwalezizipho zonke zomnikelo wokuzunguzwa zako-Israyeli. Lokhu ngikunika wena lamadodana akho lamadodakazi akho kube yisabelo esimi njalo. Kuzakuthi wonke owendlu yakho ohlambulukileyo ngokomlayo avunyelwe ukudla.

12 “Ngikunika wonke amafutha acengekileyo e-oliva lewayini lonke elitsha elicengekileyo kanye lamabele abawanika uJehova kuyizithelo zakuqala zesivuno sabo. 13 Zonke izithelo zakuqala zomlimela abaziletha kuJehova ngezakho. Kuzakuthi wonke owendlu yakho ohlambulukileyo ngokomlayo avunyelwe ukudla.

14 “Yonke into yako-Israyeli emiselwe uJehova ngeyakho. 15 Amazibulo wonke azelweyo, kuhlanganisela awabantu kanye lawezinyamazana, anikelwe kuJehova ngawakho. Kodwa uzahlenga wonke amadodana angamazibulo kanye lawo wonke amazibulo amaduna awenyamazana ezingcolileyo. 16 Kuzakuthi zingafikisa inyanga eyodwa zizelwe uzihlenge ngentengo yokuhlenga yesilinganiso samashekeli amahlanu esiliva, kusiya ngesilinganiso seshekeli lendlu engcwele, eyisisindo esingamagera angamatshumi amabili.

17 “Kodwa ungabohlenga izibulo lenkomo, loba elemvu loba elembuzi; ngoba angcwele. Chela igazi lawo e-alithareni ubusutshisa amahwahwa awo kube ngumnikelo owenziwe ngomlilo, uqhatshi oluthokozisayo kuJehova.

18 Inyama yawo izakuba ngeyakho njengoba isifuba somnikelo wokuzunguzwa kanye lomlenze kungokwakho. 19 Loba kuyini okubekwe eceleni eminikelweni engcwele eyethulwe ngabako-Israyeli kuJehova ngikunika wena kanye lamadodana njalo lamadodakazi akho kube yisabelo senu senjayelo. Lesi yisivumelwano esingapheliyo sesawudo phambi kukaJehova esakho kanye lenzalo yakho.”

20 UJehova wathi ku-Aroni, “Wena kawuyikuba lelifa elizweni labo, njalo awuyikuba lesabelo phakathi kwabo; mina ngiyisabelo sakho kanye lelifa lakho phakathi kwabako-Israyeli.

21 “AbaLevi ngibanika konke okwetshumi kwelako-Israyeli kube yilifa labo ngenxa yomsebenzi abawenza eThenteni lokuHlanganela. 22 Kusukela khathesi abako-Israyeli akumelanga basondele eThenteni lokuHlanganela, funa babe lomlandu wesono sabo bafe. 23 NgabaLevi okufanele benze umsebenzi eThenteni lokuHlanganela njalo baphathe umsebenzi wokukhangela abonayo eThenteni. Lesi yisimiso esingapheliyo lakuzizukulwana ezizayo. Kabayikuzuza ilifa phakathi kwabako-Israyeli. 24 Kodwa-ke abaLevi ngibanika okwetshumi okwethulwa ngabako-Israyeli njengomnikelo kuJehova kube yilifa labo. Kokuqondene labo yikho ngathi: ‘Kabayikuba lelifa phakathi kwabako-Israyeli.’ ”

25 UJehova wathi kuMosi, 26 “Tshela abaLevi utsho lokhu kubo: ‘Lapho lisamukela okwetshumi engilinika khona kuvela kwabako-Israyeli njengelifa lenu, kumele likhuphe ingxenye yetshumi kokwetshumi kube ngumnikelo kuJehova. 27 Umnikelo wenu uzabalelwa kini njengamabele avela esizeni loba umhluzi ovela esihluzweni sewayani.

28 Ngale indlela lani lizakwethula eyenu iminikelo kuJehova kukho konke okwetshumi elizakwamukela kuvela kwabako-Israyeli. Kulokho okwetshumi kumele liphe okuyisabelo sikaJehova ku-Aroni umphristi. 29 Kumele lethule njengesabelo kuJehova okuhle okwedlula konke njalo kungokungcwelengcwele kukho konke elikuphiweyo.’

30 “Tshela abaLevi uthi: ‘Nxa lisethula okuhle kakhulu, kuzaphathwa kini njengesithelo esivela esizeni loba esihluzweni sewayini. 31 Lina kanye labezindlu zenu lingadla konke okunye ngaphi langaphi, ngoba kuyinkokhelo yenu yomsebenzi eThenteni lokuHlanganela. 32 Ngokwethula okuhle kulakho konke aliyikuba lecala kulokho; ngakho kaliyikungcolisa iminikelo engcwele yako-Israyeli, njalo kaliyikufa.’ ”